ARIEL DORFMAN

Ĉilio

Testamento

Se ili diras al vi,
ke oni enprizonigis min,
ne kredu tion al ili.

Se ili diras al vi,
ke oni liberigis min,
ne kredu al ili.
Iutage ili devos cedi al vi,
ke tio estas mensogo.

Se ili diras,
ke mi perfidis la partion,
ne kredu tion al ili.
Iutage ili devos cedi,
ke mi restis fidela al ĝi.

Se ili diros al vi,
ke mi estas en Francio,
ne kredu tion al ili,
ne kredu al ili, se ili
montras al vi falsigitan pasporton de mi.
Ne kredu al ili.

Ne kredu al ili,
se ili montras al vi
la foton de mia korpo,
ne kredu al ili.

Ne kredu al ili,
se ili diras al vi,
ke la luno estas la luno,
se ili diras al vi,
ke la luno estu la luno,
ke tio estas mia voĉo sur la magnetofonbendo,
ke tio estas mia subskribo sur la folio.

Se ili diras al vi, ke arbo estas arbo,
ne kredu al ili,
ne kredu al ili,
nenion de tio, kion ili diras al vi,
nenion de tio, kion ili ĵuras,
nenion de tio, kion ili montras al vi.

Kaj se estos la tago,
kiam ili petos vin veni
por identigi mian kadavron,
kaj se vi vidos min tie,
kaj se voĉo diras al vi,
ke ili mortigis min,
ke, mi fuĝis de la torturo,
ke mi estas morta,
ne kredu al ili.

Se ili diros al vi,
ke mi plene, tute, por ĉiam
estos morta,
ne kredu al ili,
ne kredu al ili,
ne kredu al ili.